मुम्बई – अभिनेत्री कंगना रनावत आफ्नो पछिल्लो फिल्म ‘मणिकर्णिका’ का शूटिङको समयदेखि नै कुनै न कुनै कारण चर्चामा आइरहेकी थिइन् । यतिबेला कंगना फेरि चर्चामा त छिन्, तर विवादमा तानिएर ।

उनको अभिनय रहेको फिल्म ‘मेन्टल हे क्या’ को शीर्षकमा नै विवाद उत्पन्न भएको छ । राजकुमार राव र कंगना रनावत स्टारर यो फिल्म जुन महिनामा रिलिज हुँदैछ । फिल्मका पोस्टरले दर्शकको ध्यान तानेको पनि छ । तर, यो फिल्मको पोस्टर र टाइटललाई लिएर मानसिक हेल्थसँग सम्बन्धित व्यक्तिहरुले आपत्ति जनाएका छन् ।

उनीहरुका अनुसार यो फिल्मले दिमागी बिरामीलाई कलंकित देखाउन खोजेको छ ।

इन्डियन साइक्याट्रिक सोसाइटीले सेन्सर बोर्ड, सूचना एवम् प्रसारण मन्त्रालय र पीएमओलाई पत्र लेखेर फिल्मको शीर्षकप्रति आपत्ति जनाएको हो । रिपोर्टसका अनुसार यो फिल्मले मानसिक रोगीमाथि अपमान गरेको छ । उनीहरुको दाबीअनुसार ‘फ्रीडम अफ स्पीच र क्रिएटिभिटी’को नाममा मानसिक रोगीको मजाक उडाउन पाइँदैन ।

सोसाइटीले फिल्मको नाम चेन्ज गर्नका साथै पोस्टर हटाउन पनि आग्रह गरेको छ ।