काठमाडौं–व्यापार विस्तारका लागि भन्दै झापा पुगेका प्रकाश ढुंगाना मृत फेला परेका छन् । तयारी पोशाकको कारोबार गर्ने उनी शुक्रबार झापा गएका थिए ।
भक्तपुरबाट व्यवसाय गर्दै आएका उनी शुक्रबार नै काँकडभिट्टाको सिभिल होटलमा बसेका थिए ।

तर, उनलाई होटलमा मृत अवस्थामा फेला पारिएको छ । होटलको पंखामा झुण्डिएको अवस्थामा उनको शव फेला परेको छ। साँझ होटलका कर्मचारीले के खाने भनेर सोध्दा आफैं खबर गर्छु भनेका ढुंगाना राति मृत फेला परेको प्रहरीले जनाएको छ ।

खानाका लागि खबर गर्न जाँदा केही प्रतिक्रिया नआएको र ढोका ढक्ढक्याउँदा पनि आवाज नआएपछि प्रहरीलाई खबर गरेर ढोका खोलिएको होटल सञ्चालकले बताएका छन् ।

झुण्डिएका ढुंगाना घुँडा टेकेको अवस्थामा फेला परेका थिए । उनको शरीरमा निलडाम पनि देखिएको छ । परिवारका सदस्यले हत्या भएको आरोप लगाएका छन् ।

ढुंगाना गत चैत २९ गते पनि सोही होटलमा बसेको पाइएको प्रहरीले जनाएको छ । घटनाबारे अनुसन्धान थालिएको इलाका प्रहरी कार्यालय काँकरभिट्टाका प्रहरी नायव उपरीक्षक महेश थापाले जानकारी दिए ।