सिरिया– पूर्वी सिरियामा आतंकवादी संगठन इस्लामिक स्टेटविरुद्ध लडिरहेका कुर्दिस लडाकु नेतृत्वको फौजले युद्ध अझै अन्त्य नभइसकेको जनाएको छ । इस्लामिक स्टेटविरुद्ध पूर्वी सिरियाको डिएर एजजोर प्रान्तको बाघुज शहरमा लडिरहेको कुर्दिस लडाकु नेतृत्वको सिरियन डेमोक्र्याटिक फोर्स एसडीएफले इस्लामिक स्टेटविरुद्धको युद्ध अझै नसकिएको जनाएको हो ।

यसअघि विभिन्न सञ्चारमाध्यममा एसडीएफले इस्लामिक स्टेटलाई पराजित गरिसकेको समाचार सार्वजनिक भएको थियो । तर, बिहीबार एसडीएफले इस्लामिक स्टेट अझै पराजित नभइसकेको र बाघुज क्षेत्रका केही क्षेत्रमा इस्लामिक स्टेटविरुद्धको कारवाही जारी नै रहेको जनाएको हो ।

यसअघि बुधबारमात्र अमेरिकी राष्ट्रपति डोनाल्ड ट्रम्पले इस्लामिक स्टेट सानो भूभागमा मात्र सिमित भएको र रातभरमा इस्लामिक स्टेट पराजित भइसक्ने जनाएका थिए ।

डिएर एजजोर प्रान्तको बाघुज शहरमा इस्लामिक स्टेट पराजित भए पूर्वी सिरियामा इस्लामिक स्टेटका सम्पूर्ण भूभाग फिर्ता भइसक्ने छ ।
यद्यपि इस्लामिक स्टेटसँग अझै हजारौँ लडाकु तथा अरु नेताहरु जिवितै रहेकाले छापामार युद्ध वा अन्य शैलीका आतंकवादी आक्रमणलाई इस्लामिक स्टेटले निरन्तरता दिनसक्ने बताइन्छ ।