काठमाडौं– पूर्वप्रधानमन्त्री तथा काँग्रेसका सभापति स्वर्गीय गिरिजाप्रसाद कोइरालाको स्मृति दिवस आज (बिहीवार) नेपाली कांग्रेसले विभिन्न कार्यक्रम गरी मनाउँदैछ ।

कोइरालाले सशस्त्र संघर्षमा रहेको तत्कालीन नेकपा माओवादीसँग १२ बुँदे हुँदै शान्ती सम्झौता गरी शान्तिपूर्ण राजनीतिमा ल्याउन महत्वपूर्ण भूमिका खेलेका थिए ।

२०६२–६३ को दोस्रो जनआन्दोलनका नेतृत्वकर्ता समेत रहेका कोइराला ५ पटकसम्म प्रधानमन्त्री पनि भएका थिए ।

बीपी कोइरालाका कान्छा भाइ गिरिजाको भारतको बिहार राज्यको सहरसा जिल्लाको टेडी भन्ने गाउँमा विस १९८१ असार १८ मा जन्म भएको थियो । बुवा कृष्णप्रसाद कोइराला र आमा दिव्या कोइराला निर्वासित रहेका बेला गिरिजाको जन्म भएको थियो ।

सन् १९२९ मा परिवारसँगै भारतबाट नेपाल फर्केका कोइरालाको एक मात्र सन्तानका रुपमा काँग्रेस नेतृ सुजाता कोइराला छन् ।

२००४ सालमा कोइरालाकै नेतृत्वमा नेपाल मजदुर कांग्रेसको स्थापना गरी विराटनगर जुट मिलमा मजदुर आन्दोलनको शुरु गरेका उनी २००८ देखि २०१७ सालसम्म कांग्रेस मोरङ सभापति बनेका थिए ।

करिब ६ वर्ष जेल जीवन विताएका कोइरालाको २०६६ साल चैत ७ गते निधन भएको थियो । २०३१ सालदेखि २०४७ सालसम्म कांग्रेसको महामन्त्री रहेका कोइराला २०५३ सालदेखि लगातार पार्टी सभापति रहे ।