काठमाडौं–यतिबेला नेत्र विक्रम चन्द विप्लव नेतृत्वको नेपाल कम्युनिस्ट पार्टीका गतिविधिलाई सरकारले प्रतिबन्ध लगाएपछि उत्पन्न अवस्थाको विषयमा सिर्जित विषयवस्तुका समाचार प्राथमिकतामा पर्न थालेका छन् ।

आजको नागरिक दैनिकले विप्लव समूहविरुद्ध प्रहरीको आक्रमक अपरेसन शीर्षकमा मुख्य समाचार छापेको छ । सरकारले यो समूहको गतिविधिमा रोक लगाएपछि प्रहरीले आक्रमक अपरेसन शुरु गरेको हो । विप्लव समूहले पहाडी जिल्लामा केन्द्रित गतिविधिलाई तीब्र पारेपछि प्रहरीले अपरेसन शुरु गरेको छ ।

प्रहरीले आवश्यकता अनुसार नियन्त्रित अनुसन्धान प्रविधि र गुप्त कारबाही पद्धति अपनाएर अपरेसन शुरु गरेको छ । तर, नेपाली सेनाले भने यसको राजनीतिक समाधान खोज्न सुझाव दिएको छ । विप्लवका गतिविधिमा बल प्रयोग गर्नु राष्ट्रकै लागि घातक हुने सेनाको ठहर छ ।

त्यस्तै पीएसओ कम, पीए बढी शीर्षकको समाचारमा अहिले नेपालमा भीभीआईपी सुरक्षामा खटिने पीएसओ कम र पीए बढी भएको खबर छ । नेपालमा पीएसओ अंगरक्षक नियुक्तिमा अन्तर्राष्ट्रिय मापदण्ड तथा मूल्य मान्यताको ख्याल गरिएको छैन् ।