काठमाडौं- मलेसिया सरकारले सन् २०२० को जनवरीदेखि लागू हुने गरी श्रमिकको न्यूनतम पारिश्रमिक वृद्धि गर्ने भएको छ ।

गत महिना मलेसिया सरकारले श्रमिक पारिश्रमिक १ सय रिंगेट बढाउन निर्णय गरेको थियो । बजेटमा आगामी जनवरीदेखि मासिक एक हजार रिंगेट तलब लागू गरिएको क्षेत्रका कामदारले ११ सय रिंगेट र हाल ११ रिंगेट लागू गरिएको क्षेत्रका मजदुरहरुले १२ सय रिंगेट तलब पाउने प्रस्ताव गरिएको छ ।

मलेसियाका सांसदहरुले बढाइएको सय रिंगेट तलब अत्यन्तै न्यून रहेको भन्दै श्रमिकको तलब न्यूनतम १ हजार ५ सय रिंगेट पुर्‍याउन सरकारलाई दवाव दिएका छन् ।

श्रमिकको तलब न्यून भएको भन्दै तलब वृद्धिका लागि मानव संसाधान मन्त्रालयमाथि दवाव बढेको छ । मलेसियाको सरकारले सन् २०२० को जनवरी देखि वर्तमान न्यूनतम तलबमा एक सय रिंगेट वृद्धि गर्ने बजेट मार्फत घोषणा गरेको छ ।

मलेसियाको संसदमा सन् २०२० को बजेटमाथि छलफल गर्दै संसदले न्युनतम तलब बृद्धिका दवाव दिएको मलेसियाको अनलाइन द सन डेले उल्लेख गरेको छ । बजेटमाथि छलफल कार्यक्रममा बोल्ने सांसदले श्रमिकको तलबमा सरकारले हेरफरे नगरे आन्दोलन गर्ने समेत चेतावनी दिएको समाचारमा बताइएको छ ।