काठमाडौं– नेपाल एल पि ग्यास उद्योग संघले माग सम्बोधन नभए सम्पुर्ण एल पि ग्यास उद्योगहरु पूर्ण रुपमा बन्द गर्ने चेतावनी दिएको छ । नेपाल एल पि ग्यास उद्योग संघले बुधबार राजधानी काठमाण्डौमा पत्रकार सम्मेलन गरि विरोधका कार्यक्रमबारे जानकारी गराएको हो ।

संघले फागुन २८ गते देखि मुलुकभरका सम्पुर्ण एल पि ग्यास उद्योगहरु बन्द गर्ने र ३० गते देखि सम्पूर्ण ग्यास विक्रेताहरुबाट ग्यास विक्रिवितरण ठप्प पार्ने जनाएको छ ।

संघले फागुन १६ गते सम्म माग सम्बोधन नभए १७ गते देखि एल पि ग्यासको पिडिओ खरिद ठप्प पार्ने , सबै रिफाईनरीहरुबाट एल पि ग्यास लोडिङ्ग बन्द गर्ने, एल पि ग्यास लोड भएका बुलेटहरु भन्सार नाकाबाट नछुटाउने लगायत कार्यक्रम सार्वजनिक गरेको छ ।

संघका अध्यक्ष गोकुल भण्डारीले अनधिकृत उद्योग इजाजत, नेपाली बुलेट संचालनमा ढिलाई , बीमा लगायतका माग अझै सम्बोधन हुन नसकेकाले आफुहरु काम ठप्प पार्न बाध्य भएको बताए ।