काठमाडौं– ठूला दल सुस्त देखिए पनि साना दल सक्रिय भएका छन् । सत्तारुढ दल नेकपा तथा प्रमुख प्रतिपक्षी दल कांग्रेस आन्तरिक झमेलामा फसेका बेला सान दल राष्ट्रव्यापी अभियान लिएर गाउँ पसेका छन् । आजको अन्नपूर्ण पोस्ट दैनिकले मुख्य समाचार छापेको छ ।

भ्रातृ संगठन नेविसंघ विघटन तथा नयाँ विधानमा सहमति जुट्न नसक्दा कांग्रेस अन्योलमा छ । शीर्ष नेताबीचको टकरावका कारण महासमितिले पारित गरेको विधानलाई कांग्रेस अन्तिम रुप दिन सकेको छैन ।

त्यसैगरी भ्रष्टाचारमा मुछिएपछि राजिनामा दिएका अख्तियार दुरुपयोग अनुसन्धान आयोगका तत्कालीन आयुक्त राजनारायण पाठकमाथि विस्तृत अनुसन्धान थालेको विषयमा ‘पाठकसँग बयान लिँदै अख्तियार’ शीर्षकमा समाचार छापेको छ ।

रेश्मा बलात्कार–हत्या प्रकरणको समाचारलाई पनि अन्नपूर्णले पहिलो पृष्ठमा छापेको छ । फ्रुटी र चाउचामा लोभिँदा धनुषाकी ११ वर्षीया बालिका रेश्माको ज्यान गएको खुलेको छ । छिमेकीको बिहे भोजमा रमाइरहेकी धनुषा मिथिला नगरपालिका–३ हरिहरपुरकी दुतिया रासइली (रेश्मा)लाई बिहेमै आएका एक युवाले बलात्कार पछि हत्या गरेका हुन् ।

वैदेशिक लगानी घटेको अवस्थामा अब नेपालीले लगानी गर्ने भनेकै जलविद्युतमा हो । जलविद्युतमा स्वदेशका निजी क्षेत्रको उत्साहजनक सहभागिता भइसकेको छ । निजी क्षेत्रले उनीहरुको आर्थिक, प्राविधिक क्षमताले भ्याएसम्म लागनी गर्दैछन् । त्यसैले सरकारले आह्वान गरेको नेपालको पानी, जनताको लागनी नै आकर्षक योजना हुने आसयको पत्रिकाले सम्पादकीय लेखेको छ ।