काठमाडौं– चक्रपथ सफाइ अभियान अन्तरगत शनिबार बालाजु चोकदेखि माछा पोखरीसम्मको सफाइ गरिएको छ ।

चक्रपथ सफाइ अभियानको १०१ औँ दिनको अवसर पारेर शनिबार बिहान ७ बजेदेखि ९ बजेसम्म बालाजुदेखि माछा पोखरीसम्मको सफाइ गरिएको हो ।

घरघरबाट सफाइ अभियान संचालन गर्नुपर्छ भन्ने सन्देशका साथ चक्रपथ सफाइ अभियानलाई निरन्तरता दिइएको अभियन्ता ताराबहादुर कुँवरले जानकारी दिए । उनले सफाइ अभियानमा स्थानीय प्रहरी प्रशासन, विद्यालय, सामाजिक संघ, संस्था र स्थानीय महिलाहरुले बढी साथ दिएको बताए ।

आजको सफाइ अभियानमा पनि स्थानीय प्रहरी र महिलाहरुको उल्लेख्य सहभागिता रहेको थियो । २०७१ सालबाट सुरु गरिएको यो अभियान अन्तरगत हालसम्म कलंकीदेखि माछा पोखरीसम्ममा २७८ ट्रक फोहोर संकलन गरी व्यवस्था गरिएको छ ।

अभियन्ता कुँवरका अनुसार गत शनिबार हालसम्म निरन्तर अभियानमा सहभागी भएकाहरुलाई पूर्व प्रधानमन्त्री झलनाथ खनालको उपस्थितिमा सम्मान पनि गरिएको थियो ।

यो अभियान हरेक शनिबार बिहान ७ बजेबाट ९ बजेसम्म सञ्चालन हुनेछ । अभियानमा सहभागी भएर काठमाडौंको चक्रपथलाई सफा र स्वच्छ बनाउने अभियानमा लाग्न अभियन्ता कुँवरले सबैलाई आह्वान गरे ।