काठमाडौं– काठमाडौं उपत्यकामा चल्ने सार्वजनिक सवारीका साधानमा महिलामाथि हुने हिंसाका घटनालाई कम गर्न प्रहरीले थप विशेष टोली परिचालन गर्ने भएको छ ।

सार्वजनिक यातायातमा महिलामाथि हुने हिंसाका घटना रोक्न प्रहरीले गत वर्षदेखि विशेष टोली परिचालन गरेको थियो । विशेष टोलीले सार्वजनिक यातायातमा महिलामाथि हिंसा गर्ने २ सय ४३ जनालाई गत वर्ष पक्राउ गरेको थियो ।

महानगरीय प्रहरी प्रमुख प्रहरी नायव महानिरीक्षक (डिआईजी) शैलेश थापा क्षेत्रीले सार्वजनिक बसमा महिलामाथि हुने हिंसा कम गर्न थप विशेष प्रहरी परिचालन गर्न लागिएको बताएका हुन् ।

पछिल्लो समय सामाजिक सञ्जालका कारण उत्पन्न साइबर अपराध नियन्त्रण गर्न प्रहरी नायब महानिरीक्षकको नेतृत्वमा ‘साइबर ब्युरो’ स्थापना भएको जानकारी दिँदै डिआईजी थापाले अपराध नियन्त्रणमा सो ब्यूरोले प्रभावकारी काम समेत गरेको बताए ।

पछिल्लो समयमा साइबर अपराधमा किशोरकिशोरी र युवायुवतीको बढी संलग्नता देखिएको उनको भनाइ थियो । डिआईजी थापाले कम उमेरका आफ्ना छोराछोरीलाई सामाजिक सञ्जालबाट टाढा राख्न पनि अभिभावकलाई सुझाव दिए ।