एजेन्सी– इंग्लिस प्रिमियर लिगमा म्यान्चेस्टर सिटीले टोटनह्यामलाई पराजित गर्दै लिगको शीर्ष स्थानमा उक्लिएको छ । इत्तिहाड रंगशालामा भएको खेलमा सिटीले टोटनह्यामलाई १—० गोल अन्तरले पराजित गरेको हो ।

३४ खेल खेलेको सिटीले समान ३४ वटै खेल खेलेको लिभरपुलसँग एक अंकको झिनो दुरी बनाएको छ । लिगका केही लेगमात्रै बाँकी रहँदा यी दुई टोलीको नतिजाले प्रिमियर लिगका प्रशंसकलाई उत्साहित बनाएको छ ।

टोटनह्यामविरुद्ध सिटीका फिल फोडेनले गोल गरे । उनले खेलको शुरुआती ५ औं मिनेटमा गोल गर्दै टोलीलाई अग्रता दिलाएका थिए । टोटनह्यामले खेलको बाँकी ८५ मिनेटसम्म पनि गोल फर्काउन नसकेपछि खेल सिटीलाई सुम्पिएको हो ।

योसँगै सिटी ८६ अंकसहित शीर्ष स्थानमा रहेको छ भने दोस्रो स्थानको लिभरपुलको ८५ अंकरहेको छ । पराजित टोटनह्यामलाई भने ६७ अंकसहित तेस्रो स्थानमा यथावत रहेको छ ।