काठमाडौं– रसायनिक मल अनियमितता प्रकरणमा अख्तियार दुरुपयोग अनुसन्धान आयोगले साल्ट ट्रेडिङ कर्पोसेशनका ३ जना कर्मचारीवरुद्ध भ्रष्टाचार मुद्दा दर्ता गरेको छ ।

अख्तियारले साल्ट ट्रेडिङ कर्पोरेशनको अञ्चल कार्यालय विराटनगरका तत्कालीन प्रमुख नविनचन्द्र झासहित ३ जनाविरुद्ध भ्रष्टाचार मुद्दा दायर गरेको हो ।

अख्तियारले गरेको अनुसन्धानबाट झा साल्ट ट्रेडिङ कर्पोरेशनको विराटनगरस्थित कार्यालयको प्रमुख रहँदा १९ लाख ७ हजार ३ सय ५० रुपैयाँ बराबरको रसायनिक मल अनियमित तरिकाले बिक्री वितरण भएको पाइएको थियो ।

अख्तियारले अनियमित तरिकाले मल बिक्री बितरण गरेको अभियोगमा तत्कालीन प्रमुख सहायक दिलचन्द्र राई र तत्कालीन सहायक खगेन्द्र बस्नेतविरुद्ध पनि मुद्दा दायर गरेको छ ।

अख्तियारले तीनैजनाविरुद्ध जनही १९ लाख ७ हजार ३ सय ५० रुपैयाँ बिगो कायम गर्दै बिगोअनुसारको जरिवाना र अधिकत्तम ४ वर्षसम्म कैद सजाय मागदाबी गरेको छ ।