एजेन्सी– भारत शासित जम्मु–काश्मिरको पुलवामा भएको हमलाले बलिउड पनि प्रभावित भएको छ । भारतका सिनेकर्मीहरुको संगठन अल इन्डिया सिने वर्कर्स एशोसिएसनले पाकिस्तानी कलाकारलाई भारतमा काम गर्न प्रतिबन्ध लगाउने घोषणा गरेको छ ।

एशोसिएसनले आफ्नो घोषणालाई प्रभावकारी कार्यान्वयन तहमा लैजाने बताएको छ । बलिउडको सिने उद्योगमा पनि यसको असर विस्तारै देखिन थालेको छ । पाकिस्तानी गायकले गाएका गीतहरु सामाजिक सञ्जाल युट्युबबाट हटाउन थालिएको छ भने, विभिन्न कलाकारहरुले पाकिस्तानसँग जोडिएका कामलाई अघि नबढाउने बताउन थालेका छन् ।

भारतीय म्युजिक कम्पनी टिसिरिजले पाकिस्तानी गायक रहात पतेह अलि खान तथा आतिफ आश्लमका गीत आफ्नो यूट्युब च्यानलबाट हटाएको छ । त्यस्तै विभिन्न टेलिभिजन कार्यक्रमहरुमा पनि पाकिस्तानको पक्षमा बोल्ने कलाकारलाई हटाउने अभियान अघि बढेको छ ।

यसका कारण भारतलाई कर्मथलो बनाएर काम गर्ने पाकिस्तानी कलाकारहरु प्रभावित हुने देखिएको छ ।

पुलवामा भएको विष्फोटमा परी भारतीय सीमा सुरक्षा बलका ४० बढी सैनिकले ज्यान गुमाएपछि भारतका विभिन्न पाकिस्तानको खुलेरै विरोधमा उत्रिएका छन् । यसैको एक उदाहरण एशोसिएसनले गरेको निर्णय पनि हो ।

विगतमा पनि भारत र पाकिस्तानबीच विभिन्न विषयमा विवाद हुँदा पाकिस्तानीलाई भारतमा काम गर्न प्रतिबन्ध लगाउने गरिएको छ ।

पुलवा घटनालाई भारतीय पक्षले पाकिस्तानले आक्रमण गरेको आरोप लगाउँदै आएको छ ।