काठमाडौं– प्रहरीले त्रिभुवन अन्तर्राष्ट्रिय विमानस्थलबाट साढे ४ किलो आइस ड्रग्ससहित एक पोर्चुगिज नागरिकलाई पक्राउ गरेको छ ।

नेपालबाट दिल्ली हुँदै जापान जान लागेका उनलाई प्रहरीले विमानस्थलको चेकजाँच कक्षबाट पक्राउ गरेको हो । शुक्रबार दिउँसो इन्डियन एयरबाट उनी दिल्ली हुँदै जापान जान लागेका थिए ।

२५ वर्षीय मेन्डिज पेरिरा टिआगोलाई प्रहरीले आइस ड्रग्ससहित पक्राउ गरेको हो । उनका साथबाट प्रहरीले ४ किलो ३८० ग्राम आइस ड्रग्स बरामद गरेको प्रहरीले जनाएको छ ।

ती पोचुगिजले मोबाइल, पर्स र मोबाइल कभरका बट्टामा फल्स बटन बनाई सो परिणामको आइस एम्फेटामाइन नामक ड्रग्स लैजान लागेको अवस्थामा उनलाई पक्राउ गरिएको हो।

अन्तर्राष्ट्रिय बजारमा करोडौं मूल्य पर्ने ड्रग्स मेन्डिजले कहाँबाट ल्याए र उनलाइ कसले दियो ? भन्ने विषयमा प्रहरीले अनुसन्धान जारी राखेको छ ।