काठमाडौं– संघीय संसदको राष्ट्रिय सभामा सत्तारुढ दल नेपाल कम्युनिस्ट पार्टी (नेकपा) र प्रमुख प्रतिपक्षी दल नेपाली कांग्रेसले संयुक्त रुपमा जरुरी महत्वको प्रस्ताव पेश गरेका छन् ।

राष्ट्रिय सभामा प्रतिनिधित्व गर्ने साना दलसमेतको समर्थनमा नेकपा र कांग्रेसले बाढी तथा डुवानको संकट समाधानका लागि जरुरी महत्वको प्रस्ताव पेश गरेका हुन् ।

नेकपाका तर्फबाट खिमलाल भट्टराई, कांग्रेसका तर्फबाट बन्द्री पाण्डे र राजपका तर्फबाट बृषेशचन्द्र लालले संयुक्त रुपमा राष्ट्रिय सभामा जरुरी महत्वको प्रस्ताव पेश गरेका हुन् ।

जरुरी महत्वको प्रस्ताव पेश गर्दै सत्तारुढ दल नेकपाका सांसद भट्टराईले सत्तापक्ष र विपक्ष नभनी राष्ट्रिय संकटको मुद्दामा एक भएर उभिएको बताए ।

शुक्रबार दर्ता भएसँगै राष्ट्रिय सभामा बाढी तथा डुवानको संकट समाधानको जरुरी महत्वको प्रस्तावमाथि छलफल शुरु भएको छ ।

प्रस्तावमाथिको छलफल सकिएपछि गृहमन्त्री रामबहादुर थापा (बादल)ले उठेका प्रश्नको जवाफ दिनेछन् ।