कैलाली- धनगढीमा भएको बम बिस्फोटमा घाइते भएका एक जनाको मृत्यु भएको छ।

धनगढी उप–महानगरपालिका वडा नम्वर ४ को शहिद गेट नजिकै रहेको निलम होटलमा बिहीबार साँझ बम विस्फोट हुँदा ५ जना घाईते भएका थिए । घटनामा घाईते भएका बझाङका राम सिंहको उपचारका क्रममा मृत्यु भएको जिल्ला प्रहरी कार्यालय कैलालीका प्रहरी नायव उपरिक्षक दक्ष बस्नेतले जानकारी दिए ।
उनको धनगढी स्थित माया मेट्रो अस्पतालमा उपचारका क्रममा मृत्यु भएको हो । अन्य घाईते होटल सञ्चालक केशवराज पाण्डे, जितेन्द्र यादव, मोविन खान र लक्ष्मण सेरलाको अहिले पनि माया मेट्रो अस्पतालमै उपचार भईरहेको छ।

शुरुमा सिलिण्डर पड्किएको बताईएपनि सिलिण्डर नभएर बम भएको जिल्ला प्रहरी कार्यालय कैलालीले पुष्टि गरेको छ। घटनास्थलबाट पेस्तोल र एउटा संकास्पद मोटरसाईलक फेला परेको प्रहरी नायव उपरिक्षक बस्नेतले बताए।

सिंह र सेरला बमसहित मोटरसाईलकमा आएको र होटलमा बसिरहेको अवस्थामा भित्तामा ठोक्किएपछि विस्फोट भएको अनुमान प्रहरीले गरेको छ।

विप्लव समूहले- भन्यो हाम्रो संलग्नता छैन

यसैबीच नेत्र विक्रम चन्द्र विप्लव नेकपाले कैलाली बम विस्फोटको घटनामा आफ्नो पार्टीको कुनै संलग्नता नरहेको दाबी गरेको छ। सञ्चारमाध्यममा घटनामा विप्लव नेकपाको हात रहेको आशंकासहितको समाचार आएको अवस्थामा विप्लव नेकपाले यस्तो दाबी गरेको हो ।

नेकपा कैलालीका जिल्ला सेक्रेटरी प्रकाश मल्लले कैलाली विष्फोटको घटनामा नेकपाको कुनै संलग्नता नरहेको दाबी गरे । एक विज्ञप्ती जारी गर्दै उनले भनेका छन्, ‘कहीँ विस्फोट तथा आतंक हुँदा सिधै हाम्रो पार्टीको नाम जोड्ने र बदनाम गर्ने सरकारो नीति छ । अनावश्यक रूपमा हामीलाई मुछेर बदनाम गर्ने सरकारको नीति बन्द गरियोस् ।’

विस्फोट गराउने नीति आफ्नो पार्टीको नभएको पनि उनले बताए ।