काठमाडौं– मधेस कन्द्रित ५ वटा राजनीतिक पार्टीको एकतापछि बनेको राष्ट्रिय जनता पार्टी (राजपा) अध्यक्ष मण्डलको संयोजकको जिम्मेवारी अब अनिल झाले पाएका छन् ।

चक्रीय प्रणालीअनुसार अध्यक्ष मण्डलको नेतृत्व गर्ने समझदारीअनुसार झाले सोमबारदेखि संयोजकको जिम्मेवारी सम्हाल्न लागेका हुन् ।

पार्टी एकीकरणपछि महन्थ ठाकुर लामो समयसम्म अध्यक्ष मण्डलको संयोजक रहेका थिए । त्यसपछि नेताहरु राजेन्द्र महतो, महेन्द्र राय यादवले अध्यक्ष मण्डलको संयोजकका रुपमा जिम्मेवारी सम्हालिसकेका छन् । अहिले शरतसिंह भण्डारी अध्यक्ष मण्डलको संयोजक छन् ।

जेठ २ गतेदेखि शनिबारसम्म चलको राजपा अध्यक्ष मण्डलको वैठकले आगामी महाधिवेशन पछि पार्टी अध्यक्षीय प्रणालीमा अगाडि बढ्ने गरी विद्यान संशोधन गर्ने निर्णय समेत गरेको छ ।

राजपाले यसअघि २ वर्षभित्रमा महाधिवेशन गरिसक्ने व्यवस्था विधानमा गरेको भएपनि अब महाधिवेशन गर्ने समय १ वर्ष बढाइएको छ । राजपाले विधान संशोधन गरी ३ वर्षभित्र महाधिवेशन गर्ने विषय उल्लेख गरेको छ ।