सन्धिखर्क- ‘पिसाबलाई हिसाबमा रुपान्तरण गरौँ’ भन्ने नाराका साथ ‘मानवमूत्र सङ्कलन र प्रयोग’ सम्बन्धी तीनदिने तालिम सन्धिखर्कको किमडाँडामा सम्पन्न भएको छ ।

सन्धिखर्क नगरपालिकाको आयोजनामा भएको सो तालिममा किमडाँडाका अगुवा किसान, विद्यार्थी र शिक्षक गरी १ सय जनाको सहभागिता थियो ।

तालिमको समापन अवसरमा सन्धिखर्क नगरपालिकका प्रमुख प्रशासकीय अधिकृत जीवन ज्ञवालीले कृषि उत्पादन वृद्धि गर्न खेर गइरहेको मानवमूत्र र काम नलाग्ने वनस्पतिबाट मल उत्पादन गर्न र उत्पादन लागतमा कमी ल्याउन तालिमको आयोजना गरिएको बताए ।

प्रशिक्षक श्रीरेन्द्रप्रसाद पोखरेलले खेर गइरहेको मानवमूत्र प्रयोग गरे तरकारी उत्पादनमा वृद्धि हुने बताए ।

अर्घाखाँचीमा यस्तो खालको तालिम पहिलोपटक प्रदान गरिएको सन्धिखर्क नगरपालिकाका कृषि शाखा प्रमुख राजेन्द्र भट्टराइले जानकारी दिए ।