पेरिस– फ्रान्सको राजधानी पेरिसमा रहेको एक रेष्टुरेन्टमा आफूले अर्डर गरेको खानेकुरा छिटो नआएपछि एक ग्राहकले वेटरलाई गोली हानी हत्या गरेका छन् । पेरिसको नोइजी ले ग्रान क्षेत्रमा रहेको एक रेष्टुरेन्टमा ग्राहकले दिएको स्याण्डविचको अर्डर छिटो नआएपछि उनले वेटरलाई गोली हानेका थिए ।

काँधमा गोली लागेका २८ वर्षे वेटरको घटनास्थलमै ज्यान गएको थियो । प्रहरीले घटनाको अनुसन्धान गरिरहेको जनाएको छ । गोली हान्ने ग्राहक घटनास्थलबाट भागेको र उनको खोजीकार्य भइरहेको जनाइएको छ ।

सामान्यतः शान्त रहने त्यस क्षेत्रमा भएको घटनाबाट स्थानीयहरु भने आतंकित बनेको अन्तर्राष्ट्रिय सञ्चारमाध्यमले जनाएका छन् । उक्त रेष्टुरेन्ट केही महिनाअघि मात्र सञ्चालनमा आएको बताइएकोछ ।

सामान्यतः शान्त रहेपनि पछिल्ला केही समययता त्यस क्षेत्रमा लागूऔषध प्रयोगकर्ता र अधिक मद्यपान गर्ने युवाहरुको सङ्ख्या बढ्दै गएकाले अपराधिक घटना पनि मौलाउँदै गएको बताइएको छ ।