काठमाडौं– पत्रकार शालिकराम पुडासैनीको मृत्यु प्रकरणबारे अनुसन्धानका लागि केन्द्रीय अनुसन्धान ब्युरो (सीआईबी)को टोली पनि चितवन पुगेको छ ।

जिल्ला प्रहरी कार्यालय चितवनले अनुसन्धान गरिरहेका बेला घटना संवेदनशील भएको भन्दै सीआईबीको टोलीलाई पनि चितवन पठाइएको व्यूरोले जनाएको छ । सीआईबीबाट प्रहरी उपरीक्षक (एसपी) दीपक रेग्मी नेतृत्वको टोली गएको छ ।

पुडासैनीले आत्यहत्या गर्नुपूर्व खिचेको भिडियो सार्वजनिक भएपछि प्रहरीले पत्रकारद्वय रवि लामिछाने र युवराज कँडेल तथा नर्स अस्मिता कार्कीलाई पक्राउ गरी अनुसन्धान जारी राखेको छ । उनीहरुलाई ५ दिन थुनामा राखेर अनुसन्धान गर्न अदालतले अनुमति दिइसकेको छ ।

पत्रकार पुडासैनी २० साउनमा चितवनको नारायणगढ, बसपार्कमा रहेको कंगारु होटलमा झुण्डिएको अवस्थामा भेटिएका थिए । घटनामा अनुसन्धानका लागि भन्दै प्रहरीले तीन जनालाई पक्राउ गरेपछि रवि लामिछाने समर्थकले चितवनमा विरोध प्रदर्शन गर्दै आएका छन् ।