हङकङ– चीन सरकारको एकपछि अर्को धम्की र चेतावनीका बावजुद हङ्कङमा आइतबार पनि दशौं हजार लोकतन्त्रवादी प्रदर्शनकारीले प्रदर्शनलाई निरन्तरता दिएका छन् ।

भारी वर्षाको परवह नगरी प्रदर्शनकारी प्रदर्शनका लागि भेला भएको अन्तर्राष्ट्रिय सञ्चारमाध्यमले जनाएका छन् ।

प्रदर्शनका लागि दशौं हजार प्रदर्शनकारी हङ्कङको भिक्टोरिया पार्कमा भेला भएका छन् । विगत १० सातायता जारी प्रदर्शन हिंसात्मक बन्दै जाँदा आइतबारको प्रदर्शन भने शान्तिपूर्ण रुपमा सफल बनाउन प्रदर्शनको आयोजना गरेको हङ्कङ्को सिभिल राइट्स ह्युमन फ्रन्ट नामक समूहले आह्वान गरेको छ ।

यता चीनले भने प्रदर्शनलाई आतंकवादी गतिविधिको संज्ञा दिँदै प्रदर्शन चर्किंदै गएको खण्डमा चुप लागेर नबस्ने चेतावनी समेत दिएको छ । चीनले प्रदर्शनकारीलाई डर देखाउन हङ्कङको सीमाक्षेत्रमा सैनिक अभ्यास पनि गर्दै आएको छ ।

विवदास्पद सुपुर्दगी विधेयकको विरोधमा शुरु भएको प्रदर्शन हाल भने अधिक स्वतन्त्रता, मानव अधिकार तथा लोकतन्त्रको माग राख्दै जारी छ ।

गत सातामात्र प्रदर्शनकारीले त्यहाँको विमानस्थल कब्जा गरेपछि सयौं उडान तथा अवतरण अवरुद्ध भएको थियो ।