नवलपरासी- पूर्व–पश्चिम राजमार्गमा पर्ने अरुणखोलाको पुल एक साताभित्र सञ्चालनमा आउनेभएको छ । पूर्वी नवलपरासीको मध्यविन्दु नगरपालिकास्थित सो पुल बुधबार ट्रकको ठक्करबाट क्षतिग्रस्त भएको थियो । भौतिक पूर्वाधार तथा यातायातमन्त्री रघुवीर महासेठले शनिबार स्थलगत निरीक्षण गरी पुल चाँडो सञ्चालनको व्यवस्था गर्न निर्देशन दिएका छन् ।

मन्त्री महासेठले अहिले क्षतिग्रस्त सो पुलको मर्मतसम्भार कार्य तीव्र रूपमा भइरहेको जानकारी दिए । पुल भासिएको चार घण्टाभित्र दुई लेनको डाईभर्सन तयार गरी पूर्व–पश्चिम राजमार्ग पुनः सञ्चालनमा ल्याइएको थियो ।

निरीक्षणका क्रममा उनले मुलुककै सबभन्दा व्यस्त राजमार्गमा पर्ने सो पुलको तत्काल मर्मतसम्भार गरी बढीमा शुक्रबारसम्म सञ्चालनमा ल्याउने गरी कामलाई तीव्रता प्रदान गर्न मन्त्रालयका सचिव र सडक विभागका महानिर्देशकलाई निर्देशन दिइएको मन्त्री महासेठले जानकारी दिए ।

गत बुधबार बिहान करिब ४ बजे पूर्वबाट पश्चिमतर्फ जाँदैगरेको ना ६ ख ४७१ नम्बर ट्रकले सो पुलको एकतर्फी भागमा ठक्कर दिँदा पुल भासिएको थियो । सो पुल २०३० सालमा निर्माण गरिएको थियो ।

भासिएको सो पुलबाट अहिले पैदल यात्रीका साथै साइकल तथा मोटरसाइकल यात्री आवतजावत गरिरहेका छन् भने अन्य सवारीसाधनको आवतजावतमा भने रोक लगाइएको छ । ठूला सवारीसाधन पुलसँगै निर्माण गरिएको दुई लेनको डाइभर्सनबाट सञ्चालन भइरहेका छन् ।