काठमाडौं– ब्रिगेड ब्वाइज क्लब ललित स्मृति फुटबल प्रतियोगिताको फाइनलमा पुगेको छ । सातदोबाटोस्थित एन्फा कम्प्लेक्समा बिहिबार भएको पहिलो सेमिफाइनलमा मनाङ मर्स्याङ्दी क्लबलाई ७–१ को फराकिलो गोल अन्तरले पराजित गर्दै ब्रिगेड फाइनलमा पुगेको हो ।

ब्रिगेडलाई मनाङविरुद्ध जीत दिलाउन रेजिन सुब्बाले ह्याट्रिक गरे । यस्तै शिशिर लेखीले २ गोल गर्दा जय गुरुङ र बृजेश चौधरीले समान एक–एक गोल गरे । मनाङका सचिन गुरुङले एक गोल फर्काए पनि थप गोल गर्न नसक्दा मनाङ पराजित भयो ।

पूर्व उपाध्यक्ष एव‌ं स्व. ललितकृष्ण श्रेष्ठको स्मृतिमा अखिल नेपाल फुटबल संघ (एन्फा) ले आयोजना गरेको प्रतियोगिताको विजेताले ३ लाख रुपैयाँ प्राप्त गर्नेछ । उपविजेताले १ लाख ५० हजार रुपैयाँ पाउनेछ ।