काठमाडौं– समता अस्पतालका सञ्चालक उत्तम सञ्जेलकी श्रीमती कला सञ्जेलसहित तीन जना धरौटीमा छुटेका छन् ।

बौद्धस्थित समता अस्पतालको एक कोठामा मृत भेटिएकी कर्मचारी २७ वर्षीया विमला तामाङको मत्युपछि सञ्जेलकी श्रीमती कला सञ्जेलसहित अस्पतालकै कर्मचारी तीर्थकुमारी श्रेष्ठ र संगीता केसी पक्राउ परेका थिए ।

उनीहरुविरुद्ध जिल्ला अदालत काठमाडौंले जनही ३ लाख रुपैयाँ धरौटीमा छाड्ने फैसला सुनाएको थियो । तर, अदालतको आदेशअनुसार तीनै जनाले ३ लाख रुपैयाँ धरौटी बुझाउन नसकेपछि उनीहरु बुधबार जेल चलान भएका थिए ।

बिहीवार(आज) धरौटी रकम बुझाएपछि उनीहरु रिहा भएका हुन् । काठमाडौं जिल्ला अदालतका सूचना अधिकारी ज्ञान बहादुर कार्कीका अनुसार उनीहरुले आज मध्याह्न धरौटी रकम बुझाएका हुन् ।

मृतकका आफन्तले सञ्जेल परिवारमाथि नै आरोप लगाएपछि उनीहरुलाई प्रहरीले नियन्त्रणमा लिएको थियो ।

समता अस्पतालमा सफाइको काम गर्ने विमला तामाङको शव असार ३ मा झुन्डिएको अवस्थामा भेटिएको थियो। त्यसपछि प्रहरीले सञ्जेल दम्पतीलाई पक्राउ गरी अनुसन्धान थालेको थियो। पोष्टमार्टममा झुन्डिएकै कारण मृत्यु भएको रिपोर्ट आएको थियो ।

रहस्यम रूपमा मृत्यु भएको भन्दै सञ्जेल दम्पत्तिलाइ पक्राउ गर्न जनदवाब बढेको थियो। प्रहरीले सञ्जेल पत्नीलाई ज्यान मुद्दा चलाएको थियो। पर्याप्त प्रमाण नभएपछि उनीहरु धरौटीमा छुटेका हुन् ।