बुटवल– रूपन्देहीको तिलोत्तमा नगरपालिकाले सिद्धार्थ राजमार्गमा राखिएका वुद्ध भगवानका मूर्ति तोडफोड गरिएको छ ।

बिहीवार विहान मूर्ति तोडफोड अवस्थामा फेला परेको तिलोत्तमा नगरपालिकाका मेयरका बासुदेव घिमिरेले बताए । मेयर घिमिरेका अनुसार मूर्ति तोडफोड गर्नेहरुको खोजी भइरहेको जनाए ।

‘धर्ममाथिको आक्रमण जस्तो देखिएको छ, बुद्धको मूर्ति यहाँको पहिचान झल्काउनका लागि राखिएको थियो’ उनले भने ,’पहिचान मेटाउने कुत्सित मनसाय भएकाले घटना घटाएको हुन सक्छ।’

रुपन्देहीको सिक्सलेन सडकको शंकरनगर चोकदेखि नयामिलसम्म रहेका ५ वटा बुद्धमूर्ति तोडफोड भएको प्रहरीले जनाएको छ । प्रहरीले घटनाको अनुसन्धान भइरहेको जनाएको छ ।

गौतम वुद्धको जन्म स्थान लुम्बिनीको झल्को दिन भन्दै गत आर्थिक वर्षमा तिलोत्तमा नगरपालिकाले आफ्नो क्षेत्रमा पर्ने राजमार्गमा ६ वटा बुद्ध मुर्ति स्थापना गरेको थियो । जसमध्ये पाँच मुर्तिमा क्षति पुगेको छ ।

एउटा मूर्ति राख्नका लागि ५० देखि ६० हजार खर्च भएको र ६ वटा मूर्ति राखिएको मेयर घिमिरेले खबरहबलाई जानकारी दिए ।