काठमाडौं– नेपाली युवकले भारतीय केटी भगाएर ल्याएको भन्दै भारतको छत्तिसगढ राज्यको प्रहरीका ३ जना कर्मचारी अछाम पुगेका छन् ।

छत्तिसगढ राज्यको दिपिका थाना, कोरबाका ३ जना प्रहरी सादा पोसाकमा अछाम पुगेका हुन् । अछाम पुग्नेमध्ये छत्तिसगढ प्रहरीका सब–इन्सपेक्टर (सई) अशोक पाण्डे, हवल्दार खगेश राठोर र जवान लक्ष्मी पटेल छन् ।

उनीहरु अहिले जिल्ला प्रहरी कार्यालय अछाममा रहेका प्रहरी प्रधान कार्यालय स्रोतले जानकारी दिएको छ ।

प्रहरीका अनुसार अछामका केशव सोनीले आफ्नी १५ वर्षीया छोरी भगाएर लगेको भन्दै छत्तिसगढ राज्यको कोरबा जिल्लाअन्तर्गत शान्तिनगर–७ की ३८ वर्षीया उर्मिला राठेरले स्थानीय प्रहरीमा उजुरी दिएकी थिइन् ।

उनले आफ्नी १५ वर्षीया छोरी कुमार काजल राठोरलाई केशवले भगाएर लगेको उजुरीमा उल्लेख गरेकी थिइन् । सोही उजुरीका आधारमा साधा पोसाकमा रहेको भारतीय प्रहरी अछाम पुगेको हो ।

प्रहरीका अनुसार सादा पोसाकमा आएको भारतीय प्रहरी अनुमतिविनै अछाम पुगेको हो ।अहिले उनीहरु अछाम प्रहरी कार्यालयमा छन् ।

यद्यपि उनीहरुलाई नियन्त्रणमा भने नलिइएको प्रहरीले जनाएको छ । उनीहरुलाई नियन्त्रणमा लिने या नलिने सम्बन्धमा प्रहरी प्रधान कार्यालयको निर्देशन पर्खिरहेको जिल्ला प्रहरी कार्यालय अछामका अधिकारीले जानकारी दिएका छन् ।

केशव र उनले भगाएर ल्याएकी भनिएकी १५ वर्षीया कुमार काजल राठोरलाई पनि जिल्ला प्रहरी कार्यालयमा झिकाइएको प्रहरीले जनाएको छ ।

घटनाका विषयमा छलफल चलिरहेको प्रहरीको भनाइ छ ।