काठमाडौं । सरकारले पानी जहाज चलाउनका लागि कार्यालय स्थापना गर्ने भएको छ । सरकारका प्रवक्तासमेत रहेका सूचना तथा सञ्चार मन्त्री गोकुल बाँस्कोटाले बिहीबार मन्त्रिपरिषदले गरेका निर्णयहरू सार्वजनिक गर्दै नेपाल पानीजहाज कार्यालय स्थापना गर्ने निर्णय भएको बताए ।

त्यसका लागि १६ जना कर्मचारीको दरबन्दी रहने र त्यसको नेतृत्व उपसचिवले गर्ने उनले जानकारी दिए । त्यस्तै सरकारले रेल किन्न भौतिक पूर्वाधार तथा यातायात मन्त्रालयलाई स्वीकृति दिएको छ । जनकपुर–जयनगर रेल सन्चालन गर्न आफ्नै रेलगाडी किनेर सेवा सञ्चालन गर्ने तयारी स्वरुप यस्तो निर्णय गरेको मन्त्री बाँस्कोटाले जानकारी दिए । जनकपुर–जयनगर रेल सेवा फागुनदेखि नियमित सञ्चालन गर्ने सरकारको तयारी छ ।

यस्तै सरकारले आउँदो चैत १४ र १५ गते काठमाडौमा लगानी सम्मेलन गर्ने निर्णय गरेको छ, जसबाट वैदेशिक सहायता भित्र्याउने सरकारको लक्ष्‍य रहेको मन्त्री गोकुल बाँस्कोटाले बताए ।

मन्त्रिपरिषद् बैठकले मन्त्रीहरुको तलव र अन्य सेवा सुविधा वापत हुने भुक्तानी रकमको व्यवस्थापन गर्ने निर्णय गरेको छ । त्यस्तै कर्मचारी सञ्चय कोषको अध्यक्ष पदमा शिशिर कुमार ढुङ्गानालाई नियुक्त गरिएको छ भने प्रहरी नियमावली छैटौ संसोधन स्वीकृत गरिएको छ ।