काठमाडौं– सरकारले कात्तिक मसान्तसम्म २ खर्ब २५ अर्ब रुपैयाँ मात्रै कूल खर्च गरेको छ ।

खर्च मध्ये एक खर्ब ९६ अर्ब रुपैयाँ चालु खर्च रहेकोमा पूँजीगततर्फ भने २४ अर्ब ६८ करोड रुपैँया मात्रै खर्च भएको छ ।

वित्तीय व्यवस्थातर्फ ४ अर्ब २७ करोड खर्च गरेको सरकारले आर्थिक वृद्धिदर समेत घटाएर ७.१ प्रतिशत बनाएको छ । चालु आर्थिक वर्षको आर्थिक वृद्धिदरको लक्ष्य साढे ८ प्रतिशत रहेको थियो ।

आर्थिक ऐनअनुसार सरकारले कार्तिक मसान्तसम्ममा २५ प्रतिशतभन्दा बढी चालु खर्च र १५ प्रतिशत पूँजीगत खर्च गर्नुपर्ने व्यवस्था छ । तर कार्तिकसम्ममा चालु खर्च २० दशमलव ५५ प्रतिशत र पुँजीगत खर्च ६ दशमलव शुन्य ६ प्रतिशतमात्रै खर्च गर्न सकेको हो ।

सरकारले चालु आर्थिक वर्षको लागि सार्वजनिक गरेको १५ खर्ब ३२ अर्ब ९६ करोडमध्ये ९ खर्ब ५७ अर्ब १० करोड चालु खर्चतर्फ, ४ खर्ब ८ अर्ब पुँजीगत खर्च र १ खर्ब ६७ अर्ब वित्तीय व्यवस्थाका लागि छुट्याएको छ ।