रियाद– साउदी अरबले शनिबार मुलुकको पूर्वी क्षेत्रमा रहेको अबकायक र खुराइश तेल प्रशोधन केन्द्रमा गराइएको ड्रोन हमलामा इरानी हतियारको प्रयोग भएको प्रमाण फेला परेको दाबी गरेको छ ।

साउदी अरबको विदेशमन्त्रालयले विज्ञप्ति जारी गर्दै आक्रमणमा इरानी हतियार प्रयोग भएको प्रमाण फेला परेको र यसबारे संयुक्त राष्ट्रसंघसहितका अन्तर्राष्ट्रिय विशेषज्ञको सहयोगमा अनुसन्धान अघि बढाइने उल्लेख गरेको छ । अर्कोतर्फ अमेरिकी रक्षामन्त्री मार्क एस्परले भने आक्रमणमा इरानको संलग्नता देखिएको जनाएका छन् ।

उनले साउदी युवराज मोहम्मद बिन सलमानसँग टेलिफोन कुराकानीका क्रममा यसको जवाफ दिनका लागि उपलब्ध सबै विकल्पहरुको अध्ययन भइरहेको उल्लेख गरेका छन् । यसअघि अमेरिकी विदेशमन्त्री माइक पम्पेओले पनि आक्रमणमा इरानको हात रहेको जनाएका थिए ।

विज्ञप्तिमा साउदी विदेशमन्त्रालयले साउदी अधिराज्य आफ्नो मुलुकको रक्षा गर्न सक्षम रहेको र आक्रमण गर्नेविरुद्ध जवाफ दिन तयार रहेको जनाएको छ । साउदी अरबको आधा तेल उत्पादन प्रभावित हुनेगरी शनिबार गराइएको आक्रमणको जिम्मा यमनमा सक्रिय हुथी लडाकु समूहले लिएपनि साउदी अधिकारीले भने आक्रमणमा हुथी लडाकुको संलग्नता रहेकोमा आशंका रहेको जनाएका छन् ।

यमनमा साउदी अरब नेतृत्वको गठबन्धन सेनाको कमाण्डर रहेका साउदी सैनिक अधिकारी तुर्की अल मलिकीले भने ती ड्रोन यमनबाट प्रक्षेपाण गरिएकोमा आशंका रहेको र ड्रोन प्रक्षेपण स्थलको पहिचान गर्ने काम भइरहेको जनाएका छन् ।