काठमाडौं– प्रधानमन्त्री केपी शर्मा ओलीले नेपालमा लगानी गर्न स्वदेशी तथा विदेशी लगानीकर्ताहरुलाई आह्वान गरेका छन् । लगानीमैत्री वातावरण बनेको भन्दै प्रधानमन्त्री ओलीले स्वदेशी तथा विदेशी लगानीकर्तालाई नेपालमा लगानी गर्न आग्रह गरेका हुन् ।

प्रधानमन्त्री ओलीले नेपालमा वैदेशिक लगानीको लागि सुरक्षा र नाफा दुवै रहेको पनि स्पष्ट पारे । आइतबार कान्तिपुर मिडिया ग्रुपले काठमाडौंमा आयोजना गरेको ‘कान्तिपुर कन्क्लेभ’को उद्घाटन गर्दै उनले वैदेशिक लगानीलाई नेपालमा खुला हृदयले स्वागत गर्ने पनि बताए ।

प्रधानमन्त्री ओलीले सूर्य नेपाल, डावर नेपाल लगायतका कम्पनी सानो लगानी गरेर फैलिएकोतर्फ पनि वैदेशिक लगानीकर्ताहरुको ध्यानाकर्षण गराए ।

प्रधानमन्त्री ओलीले नेपालमा विकास, निर्माणको कामलाई अघि बढाउन सरकारले सुशासनको उपयुक्त वातावरण बनाएको दावी गरे ।