काठमाडौं– प्रमुख प्रतिपक्षी दल नेपाली कांग्रेसले नेपाल कम्युनिस्ट पार्टी (नेकपा) नेतृत्वको वर्तमान सरकार ‘तेस्रो श्रेणी’मा पनि उत्तिर्ण हुन नसकेको टिप्पणी भन्दै आलोचना गरेको छ ।

आइतवार पार्टी केन्द्रीय कार्यालय सानेपामा पत्रकार सम्मेलन आयोजना गर्दै कांग्रेस प्रवक्ता विश्व प्रकाश शर्माले सरकारको १ वर्षे अवधिबारे पार्टीको आधिकारिक धारणा सार्वजनिक गर्दै सरकार तेस्रो श्रेणीमा समेत उत्तिर्ण हुन नसकेको टिप्पणी गरेका हुन् ।

वर्तमान सरकारले भ्रष्टाचारमा छलाङ मारेको उल्लेख गर्दै शर्माले भने, ‘सरकारले एक वर्षको अवधिमा विश्वसनीयता गुमायो, बूढीगण्डकीमा राष्ट्रघात भयो ।’

प्रवक्ता शर्माले प्रधानमन्त्री केपी शर्मा ओलीमा शासकीय क्षमता र योग्यता समेत नदेखिएको आरोप समेत लगाए । प्रधानमन्त्री ओलीले देशबासीलाई ‘मनोरञ्जन’ मात्रै दिएको भन्दै शर्माले व्यंग्य गरे ।

सरकार गठनको १ वर्ष पुगेको अवसरमा प्रधानमन्त्री ओलीले फागुन २ गते देशबासीका नाममा गरेको सम्बोधनप्रति शर्माले भने, ‘प्रधानमन्त्री जब बोल्न थाल्नुहुन्छ, नागरिकले जिम्मेवार राजनेताको अभिव्यक्ति पाउँदैनन् । रमाइला अभिव्यक्ति पाउँछन् । यो एक वर्षमा उहाँले देशलाई राम्रै मनोरञ्जन दिनुभयो ।’