रसुवा– रसुवाको उत्तरगया गाउँपालिका–५ खाल्टे बगरका विस्थापितहरुको विचल्ली भएको छ । गएराति आएको हावहुरीले खाल्टे बगरमा बनाइएको घर टहरा भत्काएपछि उनीहरुको बिचल्ली भएको हो ।

सहायक प्रमुख जिल्ला अधिकारी देवर्षि सापकोटाका अनुसार हावाहुरीले उत्तरगया गाउँपालिका–५ को खाल्टे बगरमा विस्थापित परिवारले निर्माण गरेका छाप्रा आवास क्षति पुर्‍याएको हो । नेपाल प्रहरीले तयार गरेको तथ्यांकअनुसार हावाहरीबाट १३ घरटहरा पूर्णरुपमा क्षति भएका छन् भने ३२ वटामा आंशिक क्षति भएको छ ।

विसं २०७२ को भूकम्पका कारण साबिक हाकु–८ र ९ वडाबाट गोगने, मैलुङ क्षेत्रबाट विस्थापित भई ती प्रभावित नागरिक खाल्टे बगरमा बस्दै आएकाले हुन् ।

तत्कालका लागि जिल्ला विपद् व्यवस्थापन समितिबाट त्रिपाल पठाउने तयारी भइरहेको र अन्य थप व्यवस्था उत्तरगया गाउँपालिकाले गर्ने जानकारी प्राप्त भएको सहायक प्रमुख जिल्ला अधिकारी सापकोटाले जानकारी दिए ।