यमन– यमनमा सक्रिय हुथी शिया लडाकु समूहले साउदी अरब नेतृत्वको गठबन्धनले संयुक्त राष्ट्रसंघको मध्यस्थतामा भएको युद्धविराम सम्झौता उल्लङ्घन गरे साउदी अरबको राजधानी रियाद र युनाइटेड अरब इमिरेट्सको राजधानी अबुधाबीसम्म आक्रमण गर्नसक्ने चेतावनी दिएको छ ।

हुथी विद्रोही लडाकुले लाल सागरको तटमा रहेको यमनी शहर होदाइदामा संयुक्त राष्ट्रसंघको मध्यस्थतामा भएको युद्धविराम सम्झौता साउदी अरब नेतृत्वको गठबन्धनले उल्लङ्घन गरेमा रियाद र अबुधाबीसम्म आक्रमण गर्ने चेतावनी दिएको हो ।

साउदी अरब नेतृत्वको गठबन्धनले युद्धविराम सम्झौताको उल्लङ्घन गर्दै होदाइदा बन्दरगाहमा सैनिक आक्रमण गर्ने सूचना आएकाले त्यस्तो दुस्साहस नगर्न हुथी विद्रोहीले चेतावनी दिएको हो ।

हुथी विद्रोहीले सञ्चालन गरेको साबा समाचार संस्थाले जनाएअनुसार समूहसँग लामो दुरीसम्म मार हान्न सक्ने क्षेप्यास्त्रको भण्डार रहेको तथा अझ नयाँ क्षेप्यास्त्रहरुको विकास गरिरहेकाले आफूहरुलाई रियाद र अबुधाबीसम्म आक्रमण गर्न असम्भव नरहेको जनाएको हो ।

गत डिसेम्बरमा स्वीडेनको राजधानी स्टकहोल्ममा साउदी अरब नेतृत्वको गठबन्धन तथा हुथी लडाकुका प्रतिनिधिबीच संयुक्त राष्ट्रसंघको मध्यस्थतामा भएको युद्धविराम सम्झौतामा लाल सागरको तटमा रहेको होदाइदा बन्दरगाहमा हिंसा बन्द गर्ने सहमति बनेको थियो ।

यद्यपि त्यहाँ हिंसा अझै नरोकिएको बताइएको छ । युद्धविराम सम्झौता पूर्ण रुपमा लागू हुन नसक्नुमा साउदी अरब नेतृत्वको गठबन्धन तथा हुथी विद्रोही एकले अर्कालाई दोषरोपण गर्दै आएका छन् ।