पेरिस– फ्रान्समा येल्लो (पहेँलो) भेष्ट प्रदर्शन चौथो महिनामा प्रवेश गरेसँगै थप हिंसात्मक बनेको छ । पछिल्लो चार महिनायता हरेक शनिबार येल्लो भेष्ट अर्थात् पहेँलो कमिज लगाएर प्रदर्शनमा उत्रिएका प्रदर्शनकारीले राजधानी पेरिसका विभिन्न क्षेत्रमा तोडफोड र आगजनी गरेका छन् ।

प्रदर्शनकारीले पेरिसको बैंक टर्नेउडको एक शाखामा आगजनी गरेका बताइएको छ । आगजनीका क्रममा फसेका एक महिला तथा उनको शिशुलाई उद्धारकर्ताले उद्धार गरेका थिए । आगजनीबाट ११ जना सामान्य घाइते भएका छन् ।

त्यसबाहेक प्रदर्शनकारीले फ्रान्सको राष्ट्रपतीय कार्यालय शँलिजी दरबार नजिकै रहेको पसलमा तोडफेड गरेका छन् । प्रदर्शनकारी पेरिसका अन्य स्थानका पसलमा समेत लुटपाट मच्चाएका छन् ।

प्रदर्शनलाई नियन्त्रण गर्न प्रहरीले प्रदर्शनकारीमाथि अश्रुग्याँस, पानीको फोहोरा र रबरको गोली चलाएको जनाइएको छ । त्यसबाहेक प्रहरीले २ सय ४० भन्दा धेरै प्रदर्शनकारीलाई पक्राउ गरिएको जनाएको छ ।

राष्ट्रपति इम्मानुएल म्याक्रोंको सरकारले तेल र ग्याँसमा कर बढाउने निर्णय गरेपछि शुरु भएको प्रदर्शन पछिल्ला केही महिनायता आएर सामाजिक र जनजीविकाका विषयमा समेत केन्द्रित हुने गरेको छ । उनीहरुले राष्ट्रपति म्याक्रोंको राजीनामा समेत माग्ने गरेका छन् ।