श्रीनगर– केही दिनयता भारत प्रशासित कश्मीरमा लगाइएको प्रतिबन्ध खुकुलो पारिएको छ । सरकारको निर्णयसँगै कश्मीरमा स्थानीयलाई हिँडडुलका लागि सहज भएको बताइएको छ ।

प्रहरीका अनुसार शुक्रबारसम्म फोन र इन्टरनेट सेवा भने अझै पूर्ण रुपमा संचालन हुन दिइएको छैन । तर यसलाई विस्तारै सहज बनाउने तयारी भइरहेको छ । राजयलाई केन्द्रीय सरकार मातहत नै ल्याउने निर्णय भएपछि त्यस क्षेत्रमा हिंसा भड्कीन सक्ने आशंका गरेर कश्मीरमा संचार सेवादेखि प्रदर्शन गर्न नपाईने लगायतका कानुनहरु लागू गरिएको थियो ।

काश्मिरमा अहिले दशौँ हजार थप सुरक्षाकर्मीहरु खटाइएको छ । पाँच लाखभन्दा बढी सुरक्षाकर्मी यसअघि नै रहेका थिए । हिन्दुहरुको बाहुल्यता रहेको जम्मुमा भने तुलनात्मक रुपमा धेरै शान्त रहेको अधिकारीहरुले जनाएका छन् ।

उनीहरुले निषेधात्मक कानुनहरु विस्तारै खुकुलो पारिदै लगिने र जनजीवन सामान्य हुने अपेक्षा गरिएको बताएका छन् ।