सोल– उत्तर कोरियाले शुक्रबार थप दुई छोटो दुरीको क्षेप्यास्त्र परीक्षण गरेको छ ।

शुक्रवार सबेरै उत्तर कोरियाले पूर्वी तट पारी दुईवटा क्षेप्यास्त्र प्रहार गरेको हो । गत केही साता यता उत्तर कोरियाले छैटौँ त्यस्तो प्रहार हो । छ दिनअघि पनि उत्तर कोरियाले दुईवटा छोटो दुरीका क्षेप्यास्त्र जापानको सागरमा प्रहार गरेको थियो ।

अमेरिकी राष्ट्रपति डोनल्ड ट्रम्प तथा उत्तर कोरियाली नेता किम जोङ उनबीच गत जुनमा भएको भेटघाटमा परमाणु निरस्त्रीकरणबारे वार्ता पुन सुरु गर्ने सहमति भएपश्चात् उत्तर कोरियाली शृङ्खलाबद्ध क्षेप्यास्त्र परीक्षण गरेको हो ।

उत्तर कोरियाले क्षेप्यास्त्र परीक्षण पछि अब दक्षिण कोरियासँग वार्तामा नबस्ने चेतावनी दिएको छ । उत्तर कोरियाको शान्तिपूर्ण एकता समितिले अमेरिकासँग संयुक्त सैन्य अभ्यास गरेपछि पनि दक्षिण कोरिया अझै वार्तामा बस्न सकिन्छ भन्ने भ्रम नपाल्न चेतावनी दिएको हो ।

केही समयअघि दक्षिण कोरियाली राष्ट्रपति मुन जाय इनले सन् २०४५ सम्म दुई कोरियाको एकता गरिसक्ने बताएका थिए । लामो समयदेखि परमाणुअस्त्र विकासको आरोपमा उत्तर कोरियाले अन्तर्राष्ट्रिय प्रतिबन्धहरूको सामना गरिरहेको छ ।