काठमाडौं– भ्रष्टाचार नियन्त्रण, नियमन र दोषीमाथि कारबाही गर्ने निकाय अख्तियार दुरुपयोग अनुसन्धान आयोग नै शंकाको घेरामा पर्न थालेको छ ।

आयुक्त राजनारायण पाठकले ७८ लाख रुपैयाँ घुस लिएको प्रकरण सार्वजनिक भएसँगै अख्तियारको कामकारबाहीमाथिको विश्वसनीयतामा प्रश्न उठेको छ ।

मुद्दा मिलाउने नाममा आयुक्त पाठकसहितका कर्मचारीले नै बार्गेनिङ गरेर ‘सेटिङ गर्ने’ र व्यक्तिगत दुस्मनीका कारण मुद्दा लगाएर बदनाम गराउनेसम्मका काम अख्तियारबाट हुने गरेको यसले पुष्टि गरेको खबरलाई नागरिक दैनिकले मुख्य समाचार बनाएको छ ।

त्यस्तै मोबाइलले खोल्यो सुनको पोल शीर्षकमा लेखिएको समाचारमा भारतबाट ल्याएको साढे २३ किलो सुन बरामदको मुख्य हतियार मोवाइल भएको छ । मोबाइलमा भएको सम्वादका आधारमा उक्त सुन बरामद गरिएको नागरिकमा उल्लेख छ ।

अपरिपक्व कूटनीति शीर्षकको समाचारमा प्रधानमन्त्री केपी शर्मा ओली नेतृत्वको सरकारको एक वर्षको कामलाई समीक्षा गरिएको छ । प्रधानमन्त्री ओलीले विभिन्न सार्वजनिक कार्यक्रममा बोल्दा सरकारको काम देखेर विश्व चकित भएको बताउने गरे पनि एक वर्षको अवधिमा गरेका कूटनीतिक अभ्यासबाट आश्चर्यचकित हुनुपर्ने कुनै कारण नरहेको जानकारहरु बताउँछन् ।