एजेन्सी – अमेरिकी राष्ट्रपति डोनाल्ड ट्रम्पले मेक्सिकोसँगको सीमामा पर्खाल निर्माण गर्नका लागि राष्ट्रिय संकटकालको घोषणा गरेका छन् ।

राष्ट्रपति ट्रम्पले ह्वाइट हाउसको रोज गार्डेनमा पत्रकार सम्मेलन गर्दै राष्ट्रिय संकटकालको घोषणा गरेका हुन् । सन् १९७५ मा जारी भएको ‘राष्ट्रिय संकट अधिनियम’ अनुसार संकटकालको घोषणा गरिएको जनाए ।

यसअनुसार संकटकालको घोषणा गरेपछि राष्ट्रपतिले संकटकालीन शक्तिको प्रयोग गर्दै कङ्ग्रेसलाई छलेर आफ्ना योजना लागू गर्न पाउने व्यवस्था छ ।

ट्रम्पले यसअघिका राष्ट्रपतिहरुले पनि विभिन्न समयमा आफ्ना योजना लागू गर्न संकटकालको घोषणा गरेको जनाउँदै मेक्सिकोसँगको सीमामा पर्खाल लगाइछाड्ने दृढता व्यक्त गरे ।

कङ्ग्रेसले आफ्नो योजनाअनुरुप पर्खाल लगाउन पर्याप्त खर्च नदिएको भन्दै उनले मेक्सिकोसँगको सीमामा छिटो गरी पर्खाल लगाउन संकटकालको घोषणा गर्नुपरेको बताए ।

मेक्सिकोबाट लागूऔषध तस्कर, हत्यारा, अपराधी, अवैधानिक आप्रवासीहरु अमेरिकातर्फ आइरहेको र त्यसलाई नियन्त्रण गर्न अमेरिकाको दक्षिणी सीमामा पर्खाल अनिवार्य रहेको ट्रम्पको भनाइ छ ।

यता ट्रम्पले संकटकाल घोषणा गरेपछि डेमोक्रेटिक पार्टी तथा ट्रम्पको आफ्नै रिपब्लिकन पार्टीभित्र समेत आलोचना भएको छ । डेमोक्रेटिक पार्टीका नेताहरु न्यान्सी पेलोसी, चक सुमेर लगायतले ट्रम्पले घोषणा गरेको संकटकालको तीब्र आलोचना गरेका छन् । त्यस्तै रिपब्लिकन पार्टीका केही नेताहरुले पनि ट्रम्पले घोषणाको आलोचना गरेको अमेरिकी सञ्चारमाध्यमले जनाएका छन् ।

त्यस्तै डेमोक्र्यटहरुले ट्रम्पको घोषणा विरुद्ध कानूनी उपचारको बाटोमा पनि जानसक्ने चेतावनी दिएका छन् । तर, कानूनी लडाईंका लागि पनि ट्रम्प प्रशासन तयार रहेको बताइएको छ ।