हङ्कङ– विवादास्पद सुपुर्दगी विधेयकको प्रक्रिया अनिश्चितकालसम्मका लागि स्थगित गर्ने घोषणाका बावजुद दशौं हजारले प्रदर्शनलाई निरन्तरता दिएपछि हङ्कङकी प्रमुख कार्यकारी क्यारी लामले माफी मागेकी छिन् ।

प्रदर्शनकारीलाई सम्बोधन गर्दै हङ्कङ सरकारले जारी गरेको विज्ञप्तिमा यो साता भएको प्रदर्शनमा भएको झडपको जिम्मा सरकारले लिने जनाइएको छ । त्यस्तै, प्रदर्शनकारीमाथि भएको ज्यादतीको पनि आत्मालोचना समेत गरिएको छ । यद्यपि प्रदर्शनकारीको मागबमोजिम लामले राजीनामा दिने वा उक्त विधेयक फिर्ता लिने विषयमा भने केही उल्लेख गरिएको छैन ।

हङ्कङमा उक्त विधेयकको विरोधमा यो साता भएको प्रदर्शनमा ७० जना घाइते भएका थिए ।

उक्त सुपुर्दगी कानूनले हङ्कङका जनताको स्वायत्तता तथा मानवअधिकारलाई खतरामा पार्ने भन्दै हङ्कङमा विशाल प्रदर्शनको आयोजना गरिएको थियो ।