काठमाडौं– त्रिभुवन अन्तर्राष्ट्रिय विमानस्थल अब दैनिक २१ घण्टासम्म उडान तथा अवतरण हुने गरी पूर्ण क्षमतामा सञ्चालनका लागि तयार भएको छ ।

विभिन्न चरणमा भइरहेका सुधार र जिर्णोद्धारका कामहरु सकिएपछि विमानस्थल अब २१ घण्टा नै सञ्चालनमा आउने गरी तयार भएको हो ।

दोस्रो चरणको मर्मतअन्तर्गत भदौ दोस्रो सातादेखि विमानस्थल दैनिक ७ घण्टा बन्द हुँदै आएको थियो । दोस्रो चरणको मर्मतअन्तर्गत धावनमार्ग र ट्याक्सी वेको जिर्णोद्धार गरिएको त्रिभुवन अन्तर्राष्ट्रिय विमानस्थलका महाप्रवन्धक देवेन्द्र केसीले जानकारी दिए ।

केसीका अनुसार दोस्रो चरणको मर्मतको ठेक्का लिएको निर्माण कम्पनीले मर्मत सकेर सोमबार राति नै नेपाल नागरिक उड्डयन प्राधिकरणलाई आयोजना हस्तान्तरण गर्दै छ ।

यद्यपि, अहिले नै विमानस्थललाई २१ घण्टा सञ्चालनमा भने नल्याइने नागरिक उड्डयन प्राधिकरणले जनाएको छ ।

विमानस्थललाई जनवरी १ देखि २१ घण्टा सञ्चालनमा ल्याइने जनाइएको छ ।