भक्तपुर– वि.स. २०६३ सालदेखि रोकिएको भक्तपुरको जिब्रो छेड्ने जात्रा गत वर्ष आएर फेरि सुचारु भएको थियो । तर यसवर्ष जिब्रो छेड्ने मान्छे तयार नहुँदा जात्रा रोकिएको छ । यससँगै जात्रा संकटमा परेको देखिएको छ ।

गत वर्ष भाद्र शुक्लपक्ष पूर्णिमाको दिन मध्यपुरथिमि नगरपालिका दिगु भैरव मन्दिरको मण्डपमा मध्यपुरथिमि—५ चोडेका ४० वर्षीय बालकराम श्रेष्ठले जिब्रो छेडेका थिए ।

करिब १२ वर्षसम्म रोकिएको यो जात्रा श्रेष्ठले जिब्रो छेडेसँगै पुनः सुचारु भएको थियो । लोपन्मुख यो जात्रा हरेक वर्ष निरन्तर सञ्चालन होला भन्ने स्थानीयले अपेक्षा गरेका थिए ।

तर, जिब्रो छेड्ने व्यक्ति तयार नभएपछि जात्राले निरन्तरता पाउन सकेन ।

स्थानीयका अनुसार जिब्रो छेडाउने व्यक्ति मध्यपुरथिमिका श्रेष्ठ थरकै हुनुपर्ने प्रचलन रहेको छ । सोही प्रचलनअनुसार चेंया पुन्हिया मेय प्वाः खनेजु जात्रा व्यवस्थापन समितिको संयोजनमा जात्रा मनाए पनि समितिले समेत यस वर्ष अर्को व्यक्ति तयार गर्न नसक्दा जात्रा रोकिएको हो ।

२५ वर्षअघिदेखि बन्द भएर लोप हुने अवस्थामा पुगेको यो जात्रा कृष्ण नानीचा श्रेष्ठले वि.स. २०७२, २०५७ र ०६३ मा गरी १० वर्षमा तीनपटक जिब्रो छेडाएका थिए ।

त्यससँगै स्थानीयले युवा समिति गठन गरी जात्रा जोगाउने अभियान शुरु गरेका थिए । अभियानअनुसार वि.स. २०७४ मा बालकुमारीका २९ वर्षीय वीरेन्द्र भक्त गजु श्रेष्ठले र ०७५ मा थिमिका श्रेष्ठले जिब्रो छेडेर जात्रा सञ्चालन गरेका थिए ।