काठमाडौं । भारतमा जारी हिरो गोल्ड कप महिला अन्तराष्ट्रिय प्रतियोगिताको फाइनल खेलमा आज (शुक्रवार) नेपालले म्यानमारसँग प्रतिस्पर्धा गर्दैछ ।

भारतको कालिङ्गा रंगशालामा हुने खेलमा नेपाली महिला टोलीले उपाधि उचाल्ने लक्ष्यसहित मैदान उत्रिन लागेको हो । नेपाली समयअनुसार आज बेलुका ६ बजेर १५ मिनेटमा खेल शुरु हुनेछ ।

लिग चरणको पहिलो खेलमा म्यानमारसँग ३—० गोल अन्तरले पराजित नेपालले दोस्रो र तेस्रो खेलमा उत्कृष्ट लय समातेको थियो ।

लिगको दोस्रो खेलमा नेपालले भारतमाथि ऐतिहासिक २—१ गोल अन्तरको जीत हासिल गरेको थियो । जुन खेलमा नेपालले महिला फुटबलको इतिहासमै पहिलोपटक भारतलाई उसैको भूमिमा पराजित गरेको हो ।

लिगको अन्तिम खेलमा नेपालले इरानमाथि नेपालले ३—० गोल अन्तरको शानदार जीत हात पारेको थियो ।

तर, फाइनलमा म्यानमारविरुद्ध उत्कृष्ट प्रदर्शन गर्दै नेपाली महिला टोलीले ऐतिहासिक जीत हात पार्ने लक्ष्य लिएको खेलाडी तथा प्रशिक्षकले बताएका छन् ।