काठमाडौं-ताप्लेजुङलाई केन्द्रबिन्दु बनाएर ४.६ म्याग्नेच्यूटको भूकम्प गएको छ । बिहीबार साँझ ५ बजेर ११ मिनेट जाँदा ताप्लेजुङको कञ्चनजंघा संरक्षण क्षेत्रको आसपास केन्द्रबिन्दु बनाएर भूकम्प गएको खानी तथा भूगर्भ विभाग, राष्ट्रिय भूकम्प मापन केन्द्रका प्रमुख लोकविजय अधिकारीले जानकारी दिए ।

उनले यो भूकम्प २०७२ साल वैशाख १२ गते गोरखा केन्द्रविन्दु भएर गएको शक्तिशाली भूकम्प नभई नयाँ भूकम्प भएको बताए ।

ताप्लेजुङका स्थानीयबासीले पनि भूकम्पको महशुस गरेको र केहीबेर भूकम्पले अत्याएको उनीहरुले बताए ।

गोरखा भूकम्पछि निरन्तर परकम्प गइरहेका छन् । सानातिना भूकम्प पनि आइरहेका छन् । पछिल्लो समय परकम्प पातलिँदै गएको छ ।

यसअघि गत माघ ८ गते काठमाडौँको थापाथली केन्द्रबिन्दु भई ३.३ रिक्टरको परकम्प गएको थियो । विसं २०७२ वैशाख १२ को ७.६ म्याग्नेच्यूटको गोरखा भूकम्पपछि हालसम्म ४ म्याग्नेच्यूट भन्दा ठूला ५ सय १० परकम्प गइसएको केन्द्रले जनाएको छ ।