हङकङ– हङकङकी प्रमुख कार्यकारी क्यारी लामले सुपुर्दगी विधेयकको विरोधमा प्रदर्शनरत प्रदर्शनकारीलाई ‘दंगाकारी’ को संज्ञा दिन सकिने टिप्पणी गरेकी छिन् ।

प्रदर्शनकारीसँगको झडपका क्रममा घाइते भएका प्रहरीलाई भेट्न अस्पताल पुगेकी उनले आफू प्रदर्शनलाई नियन्त्रण गर्न प्रहरीको कार्यको समर्थनमा रहेको समेत जनाएकी छिन् । उनले प्रदर्शनकारीलाई कानूनको कठघरामा ल्याउने प्रहरीको अभियानमा आफ्नो साथ रहेको टिप्पणी गरेकी छिन् ।

विवदास्पद सुपुर्दगी विधेयकको विरोधमा पछिल्ला केही दिनयता हङकङमा प्रदर्शन चर्किंदै गएको छ । आइतबारमात्र प्रदर्शनकारीको सानो समूह र प्रहरीबीच झडप भएको थियो ।

प्रमुख कार्यकारी लामले उक्त विधेयक अनिश्चितकालसम्मका लागि स्थगित गरेको घोषणा गरेपनि विपक्षीले उक्त विधेयक पूर्ण रुपमा फिर्ता हुनुपर्ने र प्रमुख कार्यकारी लामले पदबाट राजीनामा दिनुपर्ने माग गर्दै आएका छन् ।

उक्त विधेयक पारित भए कानूनका रुपमा लागू भएमा हङकङमा बसोबास गरिरहेका मानिसलाई चीनतर्फ सुपुर्दगी हुनसक्ने र यसले हङकङमा विधिको शासन समाप्त हुने विपक्षीको भनाइ छ ।