काठमाडौं– बाढी पहिरोका कारण राजमार्गहरु अवरुद्ध भएका छन् । केही राजमार्गको अवरोध खुलाएपनि पुन बाढी र पहिरोका कारण अवरुद्ध भएका छन् ।

कहाँ कहाँको बाटो अवरुद्ध ?

प्रहरीका अनुसार मुस्ताङ, मनाङ, ओखलढुंगा, ललितपुर, मकवानपुर, सिन्धुली रामेछाप लगायतका जिल्लाका केही सडक खण्ड अवरुद्ध बनेको छ । मुस्ताङको बेनी जोमसोङसडक अवरुद्ध बनेको छ । त्यस्तै मनाङको बेसिशहर मनाङ सडकमा पनि अवरोध रहेको प्रहरीले जनाएको छ ।

ओखलढुंगाको सिद्धिचरण राजमार्गमा बाढीले अवरोध रहेको छ भने ललितपुरको शाित् लोकपथ हेटौडा जाने सडक पहिरोका कारण अवरुद्ध बनेको छ ।

मकवानपुरको फसेल हुँदै काठमाडौं आउने रुट पहिरोका कारण अवरुद्ध बन्दा सिस्नेरी फर्पिङ सडकखण्ड पनि अवरुद्ध रहेको प्रहरीले जनाएको छ ।

त्यस्तै सिन्धुलीको मध्यपहाडी लोकमार्ग अवरुद्ध छ भने रामेछापको मन्थलिबाट काठमाडौं आउने सडक पहिरोका कारण अवरुद्ध रहेको छ ।

प्रहरीका अनुसार भोजपुरमा गजुरमुखी भीरमा पहिरो जाँदा भोजपुर धनकुटा सडकखण्ड अवरुद्ध भएको छ । त्यस्तै रौतहटको गौर सडक खण्ड, महोत्तरीको जलेश्वर सडकखण्ड अवरुद्ध छ ।

पाल्पाको सिद्धबाबा नजिक पहिरो जाँदा सिद्धार्थ राजमार्ग अवरुद्ध भएको छ । त्यस्तै कालिकोटमा कर्णाली राजमार्ग अवरोध भएको छ भने महोत्तरीमा पूर्व पश्चिम राजमार्ग पानीको वहाव बढ्न जाँदा अवरुद्ध बनेको छ ।