काठमाडौं-ब्राजिलमा जारी ४६औं संस्करणको कोपा अमेरिका फुटबलको दोस्रो दिन ब्राजिलको स्थानीय समयअनुसार आज राति दुई खेल हुँदैछन् । जसमा समूह ‘ए’बाट भेनेज्वेला र पेरु भिड्दा समूह ‘बी’बाट अर्जेन्टिना र कोलम्बियाको भिडन्त हुनेछ । पहिलो खेल नेपालको स्थानीय समयअनुसार भने राति १२ :४५ बजेबाट शुरु हुनेछ ।

दोस्रो खेल नेपालको स्थानीय समयअनुसार आइतबार बिहान ३ : ४५ बजेबाट शुरु हुनेछ । अर्जेन्टिनाको टिममा मेस्सीसँग सर्जियो अगुइरो, पाउलो डिबाला, एन्जल डि मारियालगायत प्रमुख खेलाडी हुनेछन् भने कोलम्यिबाको टिममा हामेस रोड्रिग्वेज, फाल्काओ, जुआन काउडराडो, येरी मिनालगायत खेलाडी हुनेछन् ।

यसपटक मेस्सीको टिम अर्जेन्टिनालाई उपाधि दौडमा प्रमुख दाबेदारमध्येको एक मानिएको छ । मेस्सी सन् २०१८ मा रसियामा भएको विश्वकप फुटबलपछि पहिलोपटक अफिसियल प्रतियोगितामा राष्ट्रिय टिमबाट खेल्दैछन् । त्यसैले पनि आजको खेलमा मेस्सीलाई कमव्याकका रुपमा लिइएको छ।