काठमाडौं– नेपाल उद्योग वाणिज्य महासंघको कार्यकारिणी समिति बैठकले कार्तिक २९ गतेका लागि बोलाइएको विशेष साधारणसभा रोक्का गर्ने स्थायी समिति बैठकको निर्णय अनुमोदन गरेको छ ।

आज बसेको महासंघको कार्यकारिणी बैठकले स्थायी कमिटिको निर्णय अनुमोदन गर्ने निर्णय गरेको हो । महासंघको विधान २०४९ (छैठौ संशोधन सहित) संशोधन गर्न एउटा पक्षले गत कार्तिक २९ गते विशेष साधारण सभा बोलाएपनि अन्तिममा स्थायी समितिले रोक्का गर्ने निर्णय गरेको थियो ।

महासंघको वरिष्ठ उपाध्यक्ष स्वतः अध्यक्ष हुने व्यवस्था संशोधन गर्नुपर्ने भन्दै एक पक्षले महासंघको विशेष साधारणसभा बोलाउने तयारी गरेको थियो । तर विधान संशोधन गर्ने विषयमा महासंघको नेतृत्वले सहमति नजनाएका कारण विशेष साधारणसभा बैठक नै रोक्का भएको थियो ।

महासंघको बैठकले सामाजिक सुरक्षा योजना र सामाजिक सुरक्षा कोषका विषयमा महासंघका सदस्य, संघ संस्थाहरू जिल्लानगर यूवासंघहरू, वस्तुगत संघहरू, एसोसिएट उद्योग प्रतिष्ठाहरूसंग यथाशीघ्र छलफल गरी अघि बढ्ने निर्णय समेत गरेको छ ।

त्यस्तै उद्योगी–व्यवसायीहरूमाथि विभिन्न समयमा राज्यका तर्फबाट हुँदै आएका व्यवहार तथा रवैयाले स्वदेशी एवं विदेशी लगानीको वातावरणमा समेत प्रतिकूल प्रभाव पर्न सक्ने भन्दै सरकारको ध्यानाकर्षण समेत गराउने निर्णय गरेको छ ।