काठमाडौं– पहिलो पटक हुने लागेको महिला टि–२० क्रिकेट लिगको विजेता टोलीले ७ लाख पाउने भएको छ ।

आयोजक क्विन्स इभेन्ट मेनेजमेन्टको आयोजनामा असोज २९ गतेदेखि कात्तिक ७ गतेसम्म आयोजनक हुने वुमन्स च्याम्पियन्स लिग टी–२० क्रिकेट प्रतियोगिताको विजेताको ७ लाख पाउँदा उपविजेताले ३ लाख पाउनेछन् ।

यस्तै, व्यक्तिगत पुरस्कारतर्फ प्लेयर अफ दि म्याचले १ सय २५ सीसीको टिभियसको स्कुटरसहित ५० हजार प्राप्त गर्ने आयोजकले जानकारी दिएको छ ।

उत्कृष्ट बलर र ब्याटरले २५ हजार रुपैयाँ नगद पाउने बताइएको छ । यस्तै, प्रत्येक खेलको वुमन अफ दि म्याचले नगद रु ५ हजार र ट्रफी पाउने जनाइएको छ ।

किर्तिपुरस्थित त्रिभुवन विश्वविद्यालयको क्रिकेट मैदानमा आयोजना हुने प्रतियोगितामा देशभरका ५ शहरका ५ टिम सहभागी छन् ।

प्रतियोगितामा ललितपुर फाल्कोन्स, पोखरा पल्टन, क्यापिटल रोयल्स काठमाडौँ, चितवन राइनोज र विराटनगर टाइटन्सले प्रतिस्पर्धा गर्ने छन् ।

प्रतियोगिताको उद्घाटन खेलमा २९ गते काठमाडौं क्विन्स र चितवन राइनोजले प्रतिस्पर्धा गर्दैछन्। लिग चरणको उद्घाटन हुने दिन बाहेक अन्य दिन २–२ वटा खेल हुनेछन् । प्रतियोगिताको तयारी अन्तिम चरणमा पुगेको आयोजकले जनाएको छ ।