काठमाडौं– नेपाली कांग्रेसको भ्रातृ संगठन नेपाल तरुण दलको विवाद उत्कर्षमा पुगेको छ ।

तरुण दलका अध्यक्ष जितजंग बस्नेतले महासचिव भुपेन्द्रजंग शाहीलाई कारबाही गर्दैै पदबाट हटाएका छन् भने अध्यक्ष बस्नेतलाई महासचिव शाहीले पनि पदबाट हटाएको जनाएपछि विवाद उत्कर्षमा पुगेको हो ।

बस्नेतले शनिवार एक विज्ञप्ति जारी गर्दैै पार्टी र तरुण दलको आदर्श र सिद्धान्त विपरित गतिविधमा संलग्न भएको भन्दै महासचिव शाहीलाई हटाएको उल्लेख गरेका छन् ।

विज्ञप्तिमा भनिएको छ,‘महासचिव जस्तो महत्वपूर्ण पदमा रहेर तपाईले आफ्नो पदीय मर्यादा, जिम्मेवारी र नेपाली कांग्रेस पार्टी र नेपाल तरुण दलनको आदर्श एवं सिद्धान्त विपरित गई अनुशासनहिन कार्यहरु गर्नुभएको हुँदा नेपाल तरुण दलको विधानको परिच्छेद १० को धारा ४४ को व्यवस्था अनुसार नेपाल तरुण दलको महासचिवसहित कुनै पनि सदस्य नरहने गरी हटाइएको व्यहोरा यसै पत्र मार्फत जानकारी गराइन्छ ।’

उक्त विज्ञप्ति सार्वजनिक भएको केही बेरमा महासचिव शाहीले एक विज्ञप्ति जारी गर्दै अध्यक्ष बस्नेतलाई नै तरुण दलको साधारण सदस्य समेत नरहेनेगरि एक वर्षका लागि निष्कासन गरिएको उल्लेख गरेका छन् ।

महासचिव शाहीले अध्यक्ष बस्नेतमाथि चारवटा आरोप लगाएका छन् ।