गान्टोक– सिक्किममा पूर्व मुख्यमन्त्री पवन चाम्लिङको पार्टी सिक्किम प्रजातान्त्रिक मोर्चाका १३ मध्ये १० विधायकहरु केन्द्र सरकार चलाइरहेको भारतीय जनता पार्टी भाजपा प्रवेश गरेको भोलिपल्टै बाँकी दुई विधायकहरु पनि राज्य सरकार चलाइरहेको सिक्किम क्रान्तिकारी मोर्चा एसकेएम प्रवेश गरेका छन् ।

१३ मध्ये १२ विधायकले पार्टी छाडेपछि चाम्लिङ भने विधानसभामा एक्लै परेका छन् । मंगलबार सिक्किम प्रजातान्त्रिक मोर्चाका दुई विधायकहरु एसकेएम प्रवेश गरेको भारतीय सञ्चारमाध्यमले जनाएका छन् ।

त्यसअघि सोमबार चाम्लिङको पार्टीका १३ मध्ये १० सांसद्हरु भाजपा प्रवेश गरेका थिए । केन्द्रीय राजधानी नयाँ दिल्लीमा आयोजित एक कार्यक्रममार्फत् उनीहरु भाजपा प्रवेश गरेको भारतीय सञ्चारमाध्यमले जनाएका छन् ।

यसै वर्ष भएको विधानसभा निर्वाचनमा केबल १५ सिट जितेपछि २५ वर्षपछि सिक्किममा पवन चाम्लिङको सरकार पतन भएको थियो ।

जितेका १५ मध्ये दुई विधायकले दुई स्थानबाट जितेका कारण सिक्किम प्रजातानित्रक मोर्चाको केबल १३ सिट रहन गएको थियो ।

राज्यको सरकार गुमाए पनि राज्यको सबैभन्दा ठूलो विपक्षी दल बन्न पुगेको सिक्किम प्रजातान्त्रि मोर्चाका पवन चाम्लिङ अब एक मात्र विधायक रहेका छन् । विधानसभा चुनावमा कुनै पनि सिट जित्न नसकेको भाजपा भने अब एकाएक सबैभन्दा ठूलो विपक्षी पार्टी बन्न पुगेको छ ।